Бидний тухай

Гончигийн Цолмон нь геологийн хайгуул болон уул уурхайн салбарт 20 гаруй жил ажилласан арвин туршлагатай мэргэжилтэн юм.

Боловсрол ба Мэргэшил

ШУТИС-ийн Геологийн сургуулийг Онцлох дипломтой төгссөн. АНУ-ын нэр хүндтэй Колорадогийн Уул уурхайн сургуульд (Colorado School of Mines) хайгуулын геологийн чиглэлээр магистрын зэрэг хамгаалсан.

АНУ-ын Эрдэнийн чулуу судлалын хүрээлэнгээс (GIA) "Applied Jewelry Professional" зэрэг эзэмшсэн.

Ажлын туршлага ба Амжилт

Үйлдвэрлэлийн Геологичдын Холбоо: 2018 оноос тус холбооны Удирдах зөвлөлийн гишүүнээр ажиллаж эхэлсэн бөгөөд 2024 оны 12 дугаар сараас Ерөнхийлөгчөөр сонгогдон салбарын шинэчлэлт, дижитал шилжилтийг удирдан ажиллаж байна.

Инноваци ба Бизнес: Төв Азийн уул уурхайн салбарт дэвшилтэт технологи, автоматжуулалт болон хиймэл оюун ухааныг нэвтрүүлэгч "Trigteq" ХХК-ийг АНУ-д суралцаж байхдаа хамтран байгуулжээ.

Олон улсын туршлага: Монголоос гадна Бразил, АНУ, Хонконг зэрэг орнуудад олон улсын томоохон төслүүд дээр ажиллаж байсан туршлагатай.

Удирдах зөвлөлийн гишүүний хувьд

Гишүүнчлэл ба веб сайт

Холбооны веб сайт болон гишүүнчлэлийн системийг орчин үеийн хамтын ажиллагааны стандарт, шаардлагад нийцүүлэн шинэчилсэн.

Гадаад харилцаа

2020 оны 2 сард Канада-Евразийн Бизнесийн Холбоотой (CERBA) Харилцан ойлголцлын санамж бичиг (MOU) байгуулсан.

Чуулган ба боловсролын хөтөлбөр

"Mongolia Mineral Exploration Round-Up" - Монголын Геологи Хайгуулын чуулга уулзалт, эрдэм шинжилгээний хурлыг 2019 оноос хойш тасралтгүй зохион байгуулж, Хөрөнгө оруулагчдын уулзалт болон боловсролын хөтөлбөрийг санаачилж ажилласан.

Нийтийн боловсрол

Олон нийтэд зориулсан геологийн боловсрол, мэдээлэл олгох чиглэлээр ажилласан.

Ерөнхийлөгчийн хувьд

Бүтэц, зохион байгуулалтын шинэчлэл

Салбарт гарч буй хурдацтай өөрчлөлтөд тохируулан холбооны бүтцийг шинэчилж, орчин үеийн технологи, хэрэгцээнд суурилсан, тогтвортой ажиллах чадвартай суурийг бэхжүүлж байна.

Дижитал платформууд

Хэрэглэгчид суурилсан веб сайт (www.monseg.mn) болон бага хурлын хамтын ажиллагааны платформыг (www.mmer.mn) хөгжүүлж, нэвтрүүлж байна.

Монголын Үйлдвэрлэлийн Геологичдын Холбоо-ны Удирдах Зөвлөлийн ахмад гишүүн, геологич, уул уурхайн бодлого тодорхойлогч Даш овогтой Бат-Эрдэнэ нь Монгол Улсын геологи, уул уурхайн салбарт 40 гаруй жил үр бүтээлтэй ажилласан, онол-практикийг хослуулсан нэр хүндтэй мэргэжилтэн юм.

Тэрээр 1977 онд ЗХУ-ын Эрхүүгийн Политехникийн дээд сургуулийг уулын инженер-геологич мэргэжлээр төгсөж, хээрийн геологи, эрэл-хайгуул, улсын бодлого, олон улсын хамтын ажиллагаа хүртэлх өргөн хүрээнд ажилласан туршлагатай. Улмаар Их Британийн Дандийн их сургуульд эрдэс баялаг, газрын тосны эрх зүйгээр магистр (LLM), Монгол Улсын Техникийн Их Сургуульд эрдэс баялгийн бодлогын чиглэлээр докторын зэрэг хамгаалсан нь түүнийг салбартаа онцгой байр суурьтай болгосон билээ.

Д. Бат-Эрдэнэ нь алт, төмөр, нүүрс зэрэг ашигт малтмалын олон ордыг нээн илрүүлж, нөөц тогтоон үйлдвэрлэлд шилжүүлэхэд биечлэн оролцсон төдийгүй зэсийн порфир, уран, газрын ховор элемент, гянт болд, молибден зэрэг стратегийн түүхий эдийн хайгуулын ажлыг удирдаж ирсэн туршлагатай. Мөн Монгол Улсын эрдэс баялгийн бодлого, уул уурхайн хууль эрх зүйн орчныг боловсруулах, шинэчлэх үйл явцад идэвхтэй оролцож, төр-хувийн хэвшил, олон улсын байгууллагуудын хоорондын хамтын ажиллагаанд чухал хувь нэмэр оруулсан.

Түүний олон улсын түвшинд тавьсан илтгэл, эрдэм шинжилгээний өгүүллүүд нь Монголын геологийн салбарыг дэлхийд таниулахад чухал нөлөө үзүүлсэн бөгөөд НҮБ, бүс нутгийн болон олон улсын хурал, төслүүдэд Монгол Улсыг төлөөлөн оролцож байв.

Эдгээр бодит гавьяа, хөдөлмөрийг нь үнэлж “Тэргүүний геологич”, “Тэргүүний уурхайчин”, Хөдөлмөрийн гавьяаны улаан тугийн одон, Аж үйлдвэрийн гавьяат ажилтан зэрэг төрийн дээд шагнал, цол хүртээсэн нь түүний салбартаа оруулсан үнэлж баршгүй хувь нэмрийн илэрхийлэл юм.

Өдгөө Д. Бат-Эрдэнэ нь ахмад мэргэжилтний хувиар мэдлэг, туршлагаа залуу геологичдод өвлүүлэн үлдээж, Монголын геологи, уул уурхайн салбарын тогтвортой, хариуцлагатай хөгжилд үнэтэй хувь нэмрээ оруулсаар байна.

Монгол орны геологийн салбарт "Газрын ховор элемент" болон "Критикал металл"-ын судалгааг шинэ шатанд гаргаж, эх орныхоо баялгийг дэлхийн түвшний шинжлэх ухааны үндэслэлтэйгээр сурталчилж буй эрхэм бол Сэрээнэнгийн Жаргалан юм.

Тэрээр Японы алдарт Тохоку Их Сургуульд магистр, докторын зэргээ хамгаалж, Японы Геологийн Албанд Пост-Докторын судалгаа хийсэн олон улсын түвшний эрдэмтэн юм. Түүний мэдлэг, туршлага зөвхөн танхимд бус, хээрийн хайгуул, лабораторийн нарийн шинжилгээний (XRD, XRF, ICP-MS) салбарт чөлөөтэй хөрвөдөг.

Салбартаа Гүйцэтгэсэн Үүрэг

• Эрдэм шинжилгээ: ШУТИС-ийн Технологийн эрдэс судлал, инновацын төвийн захирлаар ажиллаж, Монгол орны стратегийн ач холбогдолтой ашигт малтмалын судалгааг тэргүүлж байна.

• Үйлдвэрлэл: Оюу Толгой ордын нөөцийг тооцоолох тайлангаас эхлээд Заамарын алтны дүүргийн хайгуул хүртэл томоохон төслүүдэд гар бие оролцсон Монгол улсын Зөвлөх инженер.

• Залгамж халаа: Өнөөдрийг хүртэл олон арван доктор, магистр оюутнуудыг удирдан чиглүүлж, "Метал ашигт малтмал", "Газрын ховор металл" зэрэг олон сурах бичиг, гарын авлагыг залуу геологчдод зориулан туурвижээ.

Түүний хөдөлмөрийг төр засаг өндрөөр үнэлж, 2023 онд Шинжлэх ухааны гавьяат зүтгэлтэн цол, Хөдөлмөрийн гавьяаны улаан тугийн одонгоор тус тус шагнасан юм.

И.Халиунаа нь МУИС-ийг геологийн бакалавр, ШУТИС-ийг ашигт малтмалын хайгуулын магистрын зэрэгтэй төгсөж, Японы Акита их сургуульд богино хугацааны ахисан түвшний сургалт дүүргэсэн.

2018 оноос геологийн салбарт мэргэжлээрээ ажиллаж, Хан-Алтай алтны ордын хайгуулаас үйлдвэрлэлийн туршлагаа эхлүүлэн Плюс Минералс, Монголын Алт МАК ХХК-уудад металл ашигт малтмалын геологич, туслах спектр геологичоор ажиллахын зэрэгцээ геологийн судалгааны ажлаараа дотоод болон олон улсын эрдэм шинжилгээний өгүүлэл, хурлын илтгэлээр хэлэлцүүлж ирсэн.

И.Халиунаа нь 2023 оноос олон улсын зөвлөх үйлчилгээний RPMGlobal болон SLR Consulting компанийн бүрэлдэхүүнд багтаж, Монгол болон Олон улсын алт, мөнгө, хар тугалга–цайр, никелийн латерит, зэс–молибден, төмрийн хүдэр, сурьма, газрын ховор элемент (REEs)-ийг хамарсан төслүүдэд ажиллаж байна.

Тэрээр хайгуулын болон геологийн өгөгдлийн баталгаажуулалт, хүдэржилт ба хувирлын 3 хэмжээст загварчлал, блок моделийн хяналт чиглэлээр ашигт малтмалын ордын нөөцийн тооцоолол, нөөцийн үнэлгээний ажлуудад оролцож, олон улсын ЖОРК стандартын нөөцийн тайлан, SK-1300 техникийн тайлан болон ТЭЗҮ боловсруулахад оролцож байна.

Мэргэжлийн чиглэлээс гадна Геологийн салбарын үнэ цэнийг олон нийт, орон нутаг, залууст таниулах чиглэлээр ажиллаж байна.

Ц.Мөнгөншагай нь геологич, бизнесийн удирдлагын мэргэжилтэй, уул уурхайн салбарт 20 гаруй жил ажилласан туршлагатай мэргэжилтэн юм. Тэрээр Хөвсгөл аймгийн Мөрөн суманд төрж өссөн бөгөөд 2001 онд Дархан хотын Техникийн коллежийг төгссөнөөс хойш мэргэжлийн замналаа багш, талбайн геологичоос эхлүүлжээ.

Суурь судалгаа, эрэл хайгуул, уурхайн ашиглалт, төслийн удирдлага, компанийн гүйцэтгэх удирдлага, ТУЗ-ын түвшинд ажилласан өргөн туршлагатай. Тухайлбал, улсын геологийн зураглалын “Бурханттолгой-50”, Улсын геологийн иж бүрдэл зураг зохиох “Дорнод Монгол-VII” төслүүдийг удирдан хэрэгжүүлж, төмөр, алт, нүүрсний чиглэлийн 20 гаруй эрэл хайгуулын төслүүдэд оролцсон байна.

Тэрээр 2014 оноос хойш МҮГХ-ны Удирдах зөвлөлийн гишүүнээр ажиллаж, улсын төсвийн хөрөнгөөр хэрэгжиж буй геологийн судалгааны ажлын чанар, үр дүнг сайжруулах, салбарын бодлого, хууль эрх зүй, зах зээлийн судалгаанд идэвхтэй оролцож иржээ.

Өнөөдөр Ц.Мөнгөншагай нь Minegolia.mn төслийг санаачлан хэрэгжүүлж, Монголын уул уурхайн төслүүдийг олон улсын стандартад нийцүүлэн системчлэх, хөрөнгө оруулалтыг татаж чадах төслийг бойжуулах экосистемийг бүрдүүлэхээр ажиллаж байна. Мөн төслийн удирдлагын PMBOK стандартыг геологи-уул уурхайн салбарт нутагшуулах судалгаа, хөгжүүлэлтийг хийж байгаа нь түүний мэргэжлийн онцлох чиглэл юм.

Тэрээр Уул уурхайн салбарын бизнесийн гадаад орчны судалгааг гүйцэтгэсний үндсэн дээр хувь хүний эрх чөлөө, бизнесийн ёс зүй, чөлөөт зах зээлийн өрсөлдөөнд суурилсан тогтолцоог салбарын тогтвортой хөгжлийн үндэс гэж үзэж “Монголын уул уурхайн салбарын бизнесийн орчин” сэдвээр илтгэл хэлэлцүүлэг хийж ирсэн.

Монголын Үйлдвэрлэлийн Геологичдын Холбоо (МҮГХ)-ны Гүйцэтгэх захирал нь уул уурхайн салбарт олон улсын түвшний боловсрол, бодит үйлдвэрлэлийн арвин туршлагатай геологич Бат-Эрдэнийн Болдхүү юм.

Тэрээр ШУТИС-ийн Геологи, Газрын тосны сургуульд геофизик, ашигт малтмалын эрэл хайгуулын чиглэлээр бакалаврын зэрэг хамгаалж, Австралийн Куртины Их Сургуулийн Баруун Австралийн Уул уурхайн сургуульд геологийн магистрын зэрэг эзэмшсэн.

Б. Болдхүү нь салбартаа 13 гаруй жил ажилласан. Оюу Толгой ХХК-д ил уурхайд геологич, ахлах геологичоор 6 гаруй жил ажиллах хугацаандаа уурхайн агуулга хяналт, геометаллурги, структур-геологийн модельчлол, богино ба дунд хугацааны төлөвлөлтийн багуудтай нягт хамтран ажиллаж, үйлдвэрлэлийн үр ашиг, аюулгүй ажиллагаанд бодитой хувь нэмэр оруулсан мэргэжилтэн юм.

Мөн тэрээр уурхайн геологийн чиглэлээр олон улсын болон бүсийн эрдэм шинжилгээний хурлуудад илтгэл тавьж, мэргэжлийн өгүүлэл, судалгааны бүтээлүүдийг хэвлүүлсэн туршлагатай бөгөөд AusIMM-ийн гишүүн, салбарын манлайлал, залуучуудын оролцоог дэмжигч нэгэн билээ.

Х.Ариунзаяа нь 2008 онд ШУТИС-ийг геологийн чиглэлээр бакалаврын зэрэгтэй, 2010 онд геологийн магистрын зэрэг хамгаалж төгссөн. Тэрээр төгссөнөөсөө хойш геологийн мэргэжлээр тасралтгүй ажиллаж, геологийн салбарт 13 жилийн ажлын туршлага хуримтлуулсан.

Ашигт малтмалын эрэл хайгуул, нүүрсний уурхайн ашиглалтын үеийн хайгуул, нөөцийн тооцоолол, геологийн өгөгдлийн менежментийн чиглэлээр мэргэшсэн бөгөөд нүүрс, уран, металлын хайгуулын томоохон төслүүдэд ахлах геологичоор ажиллаж, төслийн төлөвлөлт, хэрэгжилтэд бодит хувь нэмэр оруулж ирсэн.

Үйлдвэрлэлийн геологичдын холбооны удирдах зөвлөлийн гишүүний хувьд залуу үеийн геологичдын оролцоог нэмэгдүүлэх, эрэл хайгуул–хайгуул–ашиглалтын геологийн уялдаа холбоог бэхжүүлэх, мөн олон улсын жишигт нийцсэн үйлдвэрлэлийн геологийн арга барилыг дэмжин ажиллахыг зорьж байна.